ONS WORD GEDRA.
(Manie Colyn)

LEES: Deuteronomium 32:10-12: "Soos 'n arend wat sy kuikens op sy vlerke dra, so het die Here … Sy volk gelei" (vs.11).

Henry Moorhouse was in sy gemeente gewikkel in 'n taak wat vir hom te groot was om uit te voer. Neerslagtig oor sy swakheid en die grootte van die probleem, kon hy nie vrugbaar en gelowig met sy werk voortgaan nie. Een aand kom hy tuis met 'n swaar pak vir sy vrou. Sy invalide dogtertjie verwelkom het hom by die deur. "Laat ek dit vir mamma gee!" roep sy gretig uit en steek haar hande uit om die pak by hom te neem. "Ag, my Kindjie," antwoord Moorhouse hartseer, "jy kan dan nie eers loop nie, hoe sal jy die swaar pak tog kan dra?" "As Pappa my dra, kan ek mos die pak dra en dit vir mamma gee," antwoord sy onversteurd. In 'n oomblik maak sy swaarmoedigheid plek vir hoop en nuwe moed. Hy het heel tyd so vasgekyk teen die grootte van sy probleem aan die een kant en sy swakheid en onvermoë aan die anderkant, dat hy God nie meer kon raaksien nie. Hy het sy hemelse Vader se sorg en krag buite rekening gelaat.

Het jy 'n probleem wat vir jou té groot is? Bid Dawid se gebed (Psalm 71:9,12): " … moet my tog nie alleen laat nou dat my kragte ingegee het nie …kom my tog gou te hulp, my God!"

GEBED: Here, ek wil vandag my groot probleem in U hande plaas.